Úkimettiń qaýlysymen «Bıznestiń jol kartasy – 2020» bıznesti damytý men qoldaýdyń biryńǵaı baǵdarlamasyna ózgerister engizildi. Bul ózgerister memlekettiń qoldaýyna qol jetkize alatyn kásipkerler sanyn arttyrady dep josparlanǵan, dep jazady Qamshy.kz aqparat agenttigi.
Negizinen bıznestiń sanaty, kásipkerlerge qoıylatyn talaptar men qoldaý quraldarynyń sharty boıynsha ózgerister engizilgen. Osylaısha, shaǵyn jáne orta kásipkerlikti qoldaý maqsatynda jáne óńirlerdegi bıznesti damytýǵa búdjet qarjysynyń jetispeýshiligi máselesin sheshý úshin Baǵdarlamadan iri kásipkerlik sýbektileri alynyp tastaldy.
Jańa redaksıa boıynsha, baǵdarlamadan oblys pen qalalyq ákimshilikter janynda jumys isteıtin Óńirlik úılestirý keńesi (ÓÚK) alynyp tastaldy. Endi shaǵyn jobalardyń nesıesine sýbsıdıa berýde sheshimdi «Damý» Qory qabyldaıdy. 180 mln teńgeden aspaıtyn nesıelerdi Qor 5 jumys kúni ishinde qarastyrsa, 180 mln teńgeden astam nesıeler boıynsha sheshimdi biryńǵaı baǵdarlamanyń Óńirlik úılestirýshisi 21 jumys kúni ishinde qabyldaıdy. Kepildendirý quraly boıynsha qoldanylyp kelgen dál osyndaı ádis shaǵyn jáne orta kásipkerlikke qoldaý kórsetýde óte tıimdi ekenin kórsetti.
Kepildikti toqtatý sharttaryna qoıylatyn talaptar da jeńildedi. Ol boıynsha endi nesıe 100% maqsatty túrde jumsalmaǵan jaǵdaıda ǵana kepildik berý toqtaıdy.
Sondaı-aq, bir kásipkerdiń qolyna tıetin nesıe sýbsıdıasynyń somasyna da ózgeris endi. Ol 4,5 mlrd teńgeden 2,5 mlrd teńgege deıin azaıdy. Degenmen, nesıe mólsherlemesin sýbsıdıalaý merzimi buryn úsh jyl bolsa, qazir uzartýsyz bez jylǵa ózgerdi. Beriletin kepildemeniń merzimine shek qoıylmaıtyn bolǵandyqtan, endi kepildik merzimi nesıe merziminen aspaıdy.
Sonymen qatar, baǵdarlama boıynsha sýsbsıdıalanatyn nemese kepildik beriletin nesıeniń turaqty bekitilgen maksımaldy mólsherlemesiniń ornyna ózgermeli mólsherleme engizildi. Sýbsıdıa Qazaqstan Ulttyq banki bekitken bazalyq syıaqy mólsherlemesinen aspaıtyn jáne 5 paıyzǵa ulǵaıtylǵan nomınaldy syıaqy mólsherlerlemesi bar nesıelerge beriledi. Onyń 30-50 paıyzyn úkimet salasyna qaraı sýbsıdıalaıdy, aıyrmasyn kásipker ózi tóleıdi. Kepildik shart boıynsha ózgermeli syıaqy mólsherlemesi burynǵy keste boıynsha, ıaǵnı QR UB bazalyq stavkasy + 5% dep esepteledi.
Búdjetke tólenetin salyq kóleminiń artýymen baılanystyrylatyn tıimdilik krıterıi de alynyp tastaldy. Endi Biryńǵaı baǵdarlamaǵa qatysý shartyna sáıkes, kiristi arttyrý men jańa jumys ornyn ashý talaptaryna saı kelse bolǵany. Baǵdarlamanyń burynǵy redaksıasynda joǵaryda atalǵan talaptarmen qatar, oń sheshim alǵannan soń eki jyl ótken soń salyq túsimin 10 paıyzǵa arttyrý da talap etiletin. Bul - kóp kásipker úshin kedergi edi. Bir aıta keterligi, aınalym qarajatyn tolyqtyrýǵa baǵyttalǵan nesıelerge tıimdilik krıterıi talap etilmeıdi.
Qonaq úı nemese qonaq úı keshenderin satyp alý baǵytynda jumys isteıtin shaǵyn jáne orta kásipkerlik sýbektilerine qoıylatyn talaptar da yńǵaıly bola tústi. Bul qyzmet túri jobalardy sýbsıdıalaýdy jáne nesıege kepildik berýdi maquldaý kezinde Baǵdarlamanyń shekteý qoıylatyn krıterııleri tiziminen alynyp tastaldy.
2017 jyly 2 287 joba sýbsıdıalanyp, tólengen sýbsıdıa 36,13 mlrd teńgeni qurady. 1 065 kásipker 38 mlrd teńgeniń nesıesi boıynsha kepildik aldy (2016 jylmen salystyrǵanda 112% artqan). Kepildiktiń jalpy kólemi 15 mlrd teńge.
